وهدءِ مسترین لوٹ تپاکی، مُچی و هورکاری انت

هنچوش که په پهکان پدر و الم انت ایران هورین راجانی ملک انت. بلوچ یکے چه اے راجان انت که په وتی حقانی گرگءَ جد و جهد کنگءَانت.

ایران ءِ هونوارین و پلیتین رجیم انساپ نا پسندین و دیکتاتورین ملکے انت که گون وتی دلوت سپتین پکر و هیالا، گون وتی سلاحبندین سپاهیگ و فوجیان چه بلوچءِ کشگا هچ چک و پد نبینت و په اهانی دلا بلوچءِ کشگ چه مشکےءِ کشگا هن اسانتر انت.

ایرانء اسلامی جمهوری رجیم، هورین راجانی جنز و اڑ و جنجالانی نیمگا دلگوش دیگءَ نه انت که هچ بلکین چه کسان سالین و معصومین رویا سارانیءَ کشگا ونوک ورناین سعید قننبرزهی ء پاهو دیگا هن چک و پد نبیت.

اے پدرین و المین گپے که بلوچ راج چه هما بنیادی حق و حقوقان که هما گزرانی،اجتماعی و دودوربیدگی حقان انت، زبهر انت. تئے کوم ژند و ژول انت. تنے راج سند و سیل انت.

بلوچستانءِ هر کنڈیا چه سرحدءَ بگر تان مکران زمینءَ، اس جمبور انت.همے چنت ماهانے تها گیش چه 200بلوچ ورنا گون اے دلوت سپتین ایرانءِ اسلامی رجیمءِ سلاحبندین پاسدار و فوجیانی تیرانی آماچ یا که پاهو دیگ بوتگ انت.

هنچوش که شما زانت بلوچستان یکے چه دگنیاءِ ازگار و سیرین ملکان انت.بلوچستانءِ تیابءِ نیلین زر،گیس، سنگ مرمر...و چه اے دگه معدنی چیزان مالا مال انت.بلوچستان چه تاریخی و جغرافیایی لحاظا هن باز اهمیت دارین ملکے انت.

همبلان کینگان کوتاه کن ات.دگنیا مان بیست و یکمی کرنے تها انت.

دگنیا گون علم و تکنیک، کامپیوتر و انترنتءَ دیما روگا انت.

دگنیاءِ دوقطبی پرشگءَ رند، بازین راجے گون وتی تپاکی و هورکاری و مچیانی وجه ءَ په وتی مکسد و مرادان سوبین بوتگ انت.

منی هیالا وهدءِ مسترین لوٹ په بلوچ راجءَ تپاکی، هورکاری و مچی انت.

تپاکی و هورکاری، راجانی دیمرویءِ اسپر انت و کومانی منزلا آسانتر کنت.

په بژن و ارمان منیگ و تئیگ راج انگت ناتپاکی آماچ انت. من و تو انگت گون وتی هما بے بنیادین اڑ و جنجالان دست گٹیں ۔ من منان و تو تو . بلوچ راجءِ واننده و زانتکار انگت گون تپاکی و هورکاریا هیل نکتگ.

همبلان!

مروچی بازین بدلی و سدلی یے مان مئے هند و دمگان آتکگ و آئیگاانت. عراق و اوگانستانءِ هالات هنچوش دیما روگا انت که ملاءِ وابی چه چمان پرینتگ.

په اے هاترا لازمی انت که بلوچ راجءِ روشن هیالین و زانتکارین و کواسان و بلوچستانءِ راجی تنظیم و پارٹیان په یک راجی (ملی) اتحادءِ جورینگءِ هاترا گون یک ودگرا ،گپ و ترانی دیالوگے هرچے زوتر بنگیج بکن انت که دگنیاءِ بدلی و سدلیان په تیزیءَ دیما روگاانت.

من چه وتی زردءِ جهلانکیان یک پدے دگه دزبندی کنان که په اے اڑ وجنجالانی ولگوج کنگءِ هاترا تپاکی و هورکاری ءِ گِه و منگهین بئیرکءَ گون راجءِ روشن هیالین و زانتکار و کواسان و بلوچستانءِ راجی تنظیم و پارٹیان بٹهین ات و تپاکی ءِ مهر و کشارانءَ آپ بدئیت.

منی پیشنهاد په اے مکسد و مرادانی رسگا که پهکانی دلی هب و واهگ انت شمی هذمتءَ پیش کنان :

1- گپ و ترانی جار گون پهکین بلوچ زانتکار و تنظیمان.

2-مزن دیوانےءِ گرگءِ جار و رند چه مزن دیوانا، گون اے دگه ڈنی سمیناران بهر زورگ

3-گون ایرانی تنظیمان گپ و تران کنگ.

4- گپ وتران گون حقوق بشرءِ تنظیمان و بلوچ راج ءِ جنزءِ دیما برگ.

باهیان بلوچ